पुनर्जन्म
<><><><><><><><><><><>
नको मोक्ष मज नकोच मुक्ती
पुन्हाच मानव जन्म हवा
या जन्मी जे राहून गेले
भोगाया ते जन्म हवा
कधी न पुसले अश्रू कुणाचे
हासू न कोण्या ओठी आणले
प्रवाहात ना कधी पोहलो
काठावरती जीणे टांगले
शब्दांचे घट भरता-भरता
शब्दच अवघे जीवन झाले
तरी उपेक्षित जीणेच जगलो
यश शिखराचे कधी न पाहिले
योग्य पुत्र ना योग्य पति मी
योग्य बंधु ना योग्य सखा मी
अपूर्णतेचा शाप शिरावर
जीवन अवघे जळत राहिले
पुण्य न इतके कधी साठले
पापाचे ना टोक गाठले
जन्म-मृत्यूच्या फे-यामधुनी
सुटण्याचे मी दोर कापले
जगायचे जे राहून गेले
जगावया ते जन्म हवा
मोक्ष-मुक्ती ती नकोच मजला
पुन्हाच मानव जन्म हवा
: अशोक कुळकर्णी
कोणत्याही टिप्पण्या नाहीत:
टिप्पणी पोस्ट करा